|
返工搵得$15,000一個月，平時洗費又大，就算搵到個好女友，都無錢將佢私有化、同佢拉埋天窗。其實如果平平地，20萬搞婚禮都可以好有睇面，想3年抱得美人歸絕對唔係無可能架！
以月入$15,000，想3年儲20萬，即每個月儲$5,555，大約三分一份月薪，其實唔難，只要好好善用資源就得。
要成功實行儲蓄計劃，不妨參考以下的tips。
一、利用信用卡儲積分，換戲飛 / 餐飲券
只要準備找卡數，唔好只係還min pay，其實用信用卡係有好多好處，其中儲積分換禮物就可以每個月幫你節省少少支出。例如儲夠分就可以換2張戲飛，可以同女朋友去睇戲拍拖，同時又可以慳返百幾二百元；又或者可以換餐飲券，咁樣就可以河減輕吓食飯嘅支出。
二、盡量食住家飯 / 自己煮
如果想將返工一日嘅洗費減到最少，可以一日3餐都食住家飯，喺屋企食早餐、晏就帶飯、放工返屋企食晚餐就最理想。就算係住家飯食，都可以自己煮，仲可以同女朋友一齊玩吓煮飯仔，唔識煮或者可以跟霆鋒學野，仲可以學下點chok。
三、少搭的士
有時貪方便、訓晏咗遲到就去咗搭的士，但就會加重咗車費嘅負擔。提醒自己預好時間出門，唔好賴床，盡量少搭的士，或者搵多幾個人一齊先搭的士。仲可以設立獎罰計劃，做到一星期準時起身返工唔搭的士，可以獎勵自己食餐好；如果唔得，就係娛樂/雜費個項扣$100。
四、適量投資，錢搵錢
除咗MPF同每月固定儲蓄$5,555，如果每月有多餘嘅錢可以買下股票、債券、基金，風險高低就因人而異，但適量投資、利用錢搵錢，唔只可以加快儲蓄速度，仲可以有多一筆錢以備不時之需。
|
