|
本港人口老化，年老無依的問題，比比皆是。去年初嚴重中風的溫太，病後失去活動及自理能力，當保安員的丈夫被迫辭掉工作，領取約九千元綜援金，全職照顧她。廿四小時「困獸鬥」，令二人差點亦成為悲劇的主角。
今年六十八歲的溫太，與年輕十年的丈夫結婚二十多年，膝下猶虛。早年患有糖尿病和腎病，過去多年一直自行打胰島素針和每日洗腎三次。惟去年她突然中風，右邊身癱瘓，自此她連拿起一隻匙羮的力氣也沒有。
沖涼要靠儀器吊起、長期要用紙尿片，雙腳更長期受神經痛折磨。「最辛苦時好想死，但連拎利器都冇能力，又冇勇氣插死自己。」溫太難以承受身體巨變，情緒變差；照顧她的丈夫，也無法宣洩重擔，起初大半年，天天嗌交，仇視對方。「好無助，完全唔知點照顧佢。換衫、沖涼全部要幫佢，仲有打針、洗腎……後來佢屁股生痤瘡又要洗傷口。」
二人沒有子女，溫生人生首次接觸尿片便是幫妻子換片，日子艱苦難捱，他甚至不止一次對着妻子說：「我真係好想鍊死你，然後跳樓死。」
「想搵個人傾偈都冇」
兩個人沒有抖氣空間，屈在沒有房間、不足三百呎的公屋。「返工都有休息時間，但而家年中無休，每朝五點半起身整熱洗腎水，六點幾佢醒咗開始打針、洗腎、買早餐、做家務，最難頂係三更半夜佢不停叫痛，一晚起幾次身幫佢按摩，完全無得瞓。」面對當時的日子，溫生根本抖不到氣。
壓力快爆煲的溫生，直言「想搵個人傾偈都冇」。猶幸有次她帶妻子到醫院覆診，主動到院內找社工。「嗰刻我乜都唔理，淨係同佢哋講可唔可以聽我講嘢？」這次會面，令溫生適時減壓，為他開了一扇窗。
社工轉介他們到香港基督教服務處的樂伴‧同行計劃，自此每星期三天，有復康職員上門為溫太洗澡和做運動，又安排她到日間日託中心活動、吃午飯，溫生亦因此變相有喘息空間。
溫生溫太這天接受訪問，坦言雖然身上的痛楚猶在，但最難過的時刻已經走過，「好彩及時搵到人幫，唔係我哋唔知變成點。」
「儲錢儲人儲健康」
新聞工作者陳曉蕾最近獲得資助，創辦「大銀力量」非牟利機構，提供長者資訊。「二○二三年，每四個人就有一個長者，令人擔心係一一年開始，香港住戶人數已少過三個、住戶年歲超過六十歲，即係愈來愈多家庭，只有一個或兩個老人家自己住。」
陳指，不少照顧者或老人家，不懂向社區尋求幫助。「本港好多NGO有好正嘅服務，但患者或照顧者唔識去搵，有啲NGO又唔會宣傳。」她舉例賽馬會資助長者安居協會的健康電子管理計劃，每星期向患者提供三次驗血壓、血脂和血糖服務，五分鐘便經由手機發送報告結果，半小時內更有護士聯絡講解。另聖雅各福群會的「到戶娛樂家」服務，為壽命短過半年的臨終者安排魔術師、科學家上門提供娛樂服務。「但點解呢啲服務冇人知？」她說。
「刊物最想俾四十五歲至六十五歲呢班照顧者睇，呢個年紀，開始照顧患病父母，揹起唔少重擔，若佢哋及時掌握資訊，得到支援，一來冇咁辛苦，老人家又得到適切支援，照顧者甚至可及早為自己預備。」她說。
「步入老年唔只儲錢、儲健康，最重要係儲人，即係冇仔女，要及早搵定幫到自己嘅社會服務，有事時起碼有人照顧。」陳曉蕾說。
香塂基督教服務處督導主任李志剛強指，該機構推出的樂伴.同行計劃，以家居為本的外展形式，協助六十歲或以上，居住於深水埗及觀塘的長者提供社區照顧及復康活服務，團隊包括：護士、職業治療及受過訓練的復康人員等
。
「佢哋(病患者)自己休身好大情緒，中咗風或者病嘅老人家照顧唔到自己，忽然由一個正常嘅人變咗依賴嘅人，可能有機會出現情緒問題，抑鬱諸如此類。如果另一半要照顧佢，又唔識做，又無知識，又無人幫手，又要夾硬做，大家有啲似閂埋門，兩個對住愁眉對愁眉。可能有時諗埋一邊。好似了結咗佢大解決咁。其實唔啱囉，其實社會上好多服務幫到佢手。」他說。
資料來源：壹週 |
