「港式分居」又稱「婚後分居」，簡單而言是兩公婆結婚後分開住，這種無奈的現實越趨普及，統計處數據香港3成已婚青年正是如此。IT人張生與太太2017年結婚，他說：「結婚後都仲係自己一個人住。」婚後2年，自己租住朋友一間房，太太留在娘家。張太說：「一個禮拜見幾次嘅，我去佢嗰邊，佢去吓我嗰邊。」兩人月入近年才增至約6萬元，儲蓄約7年儲落70多萬元，來到不惑之年，去年年初才以570萬元買入屯門弦海一房單位上車。張生睄一睄老婆說：「咪因為（當年）做錯決定囉！」

IT人張生與太太2017年結婚，他說：「結婚後都仲係自己一個人住。」

統計處《2016年中期人口統計主題性報告：青年》，統計15至24歲青年，當中有32.5%，即5,156人是已婚但只與父母同住，並且沒有與配偶及／或子女同住，比起2011年錄得4,935人（佔比29.3%），增加221人或3.2個百份點。另外，根據生活易ESDlife 2019年調查，訪問1,297位準新人，29%表示婚後需與家人同住。

港人張生與父母居住外國多年，2010年隻身回港發展，「香港都有親戚，但無打搞佢哋，盡量做自己想做嘅嘢。當時喺外國工作咗一段時間，工作停咗。當時有香港朋友租地方畀我住，都係其中一個返香港原因，因為有地方落腳，咪試吓囉。」他在香港發展後，多年來以「友情價」租住朋友單位內其中一間房。

及後他在香港認識了老婆，拍拖6年，2017年結婚，他表示：「結婚後都仲係自己一個人住。」他解釋，因為太太在屯門工作，留在她父母家方便每天上班，而他是租住朋友間屋的一間房，又覺得外母家空間少，如此就展開「港式分居」達2年時間。張太說：「一個禮拜見幾次嘅，我去佢嗰邊，佢去吓我嗰邊。（佢間屋有外人喺度嗎？）間房無。有段時間都慣咗㗎啦，而我本身工作都好忙。」她補充，有時丈夫會到屯門娘家住吓，住在屯門一個400方呎居屋單位，「同我爸爸媽媽一齊住，地方有限，我哋自己喺間房，少啲空間，成日就屈喺間房度。為免磨擦，我哋成日喺間房到活動囉！嗰啲活動係睇戲、打機，空間始終無咁大。」張生補充：「一間房我哋，另一間房佢爸爸媽媽。（相處有困難？）都困難，因為佢阿媽比較嘈少少，比較多嘢講。」

被問當時結婚前沒有先考慮到置業的問題嗎？張太無奈說：「都搞咗好耐，如果唔係結咗婚好耐啦，就係因為搞唔掂住嘅問題。因為住嘅問題，一拖再拖，去到一個位，算啦，唔想再拖啦，結咗先算啦⋯⋯（個位係？）身邊啲朋友和同事，細過我，都結婚囉。咁我哋都有呢個計劃，咪完成咗先囉。」

張生是IT人，張太從事教育工作，雙方月薪近年才增至約6萬元，談到近40歲才上車？張生眼尾睄一睄太太說：「咪因為做錯決定囉！」張太即說：「都可以咁講嘅。2012年我畀咗錢屋企人裝修間屋，但我爸爸媽媽開心，我好錫佢哋。」張生插嘴說：「啫係最適合買樓嘅時候，人哋買樓，佢就……」張太搶說：「我都唔知，嗰時啱啱同佢拍拖，都無諗到結婚。父母間屋好殘舊，牆濕呀，有蟻呀。」

張太續說：「屋企人真係有需要吖嘛，筆錢我儲咗好多年。當時我有諗過幫父母換樓，如果嗰時買咗樓，而家就買唔到。」「我唔想諗返轉頭，可能當時有另一個投資會好啲，但我無研究樓市，我唔識……父母間屋太殘舊，使咗40萬元裝修，渠、電線駁到出走廊都換埋，可以有排住。你問我有無後悔，其實無得後悔，因為個刻我唔知道樓價會升到咁。如果我知，我梗係後悔啦。無㗎，我份人好開心，我係唔會諗返轉頭，咁諗，做人咪好唔開心囉。我哋過咗好多年好慳嘅生活，養成節儉習慣，而家人工高咗，生活都舒服咗。」

他們儲蓄約7年，儲落70多萬元，去年初睇中莊士中國（298）屯門新盤弦海一房單位，實用348方呎，惟價位達570萬元，兩成首期約114萬元，最終雙方父母資助尾數共30多萬元，幫助他們上車。不過張生坦言不喜歡屯門區，距離市區遠，原本想買二手樓，認為面積較大，惟最終遷就老婆。

張生張太以大約570萬元買入莊士中國（298）屯門新盤弦海一房單位，實用348方呎。

影片及圖片： 蘋果新聞 │ 資料來源： 蘋果新聞